+††±منتديات وشـات افـــا كـاراس±††+
اهلا بيك زائرنا العزيز نورت منتديات الانبا كاراس
انت لم تسجل بعد يسعدنا ان تسجل لتري كافة مواضيع المنتدي
ونتمني لكم دوام الاستفادة +††±منتديات وشـات افـــا كـاراس±††+

+††±منتديات وشـات افـــا كـاراس±††+
 
الرئيسيةالمجلةس .و .جالتسجيلدخول
  اهلا بكل الاعضاء والزائرين يارب المنتدى ينال اعجابكم ونشوف مشراكاتكم معانا ولا تبخلو بلردود والمشركات اتمنالكم اقامه سعيده فى بتكم التانى واللى يحب يشرف فى اى قسم يحبه يكتب طلب فى قسم طلبات الاعضاء

شاطر | 
 

 اوعى تكون متعرفشتعريف الغباوه

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ابنه الملكه
+قبطى فعال+
+قبطى فعال+


موهبتك : الترانيم
شفيعك مين : العذراء مريم
الأية الذهبية : يا ابنى اعطنى قلبك ولتلاحظ عيناك طرقى
النوع : انثى عدد المساهمات : 279
تاريخ التسجيل : 22/09/2010
العمر : 26

مُساهمةموضوع: اوعى تكون متعرفشتعريف الغباوه   الثلاثاء سبتمبر 28, 2010 2:45 am


تعريف الغباوة



بلاد الله كتير! .. لكن الله اختار مصر عشان تكون بلدى

المدارس كتير !.. لكن الله اختار مدرسة ( القلب المقدس ) عشان تكون مدرستى

كنا بنقضى فى المدرسة وقت أكتر من الوقت اللى بنقضيه مع أهلنا .. فكان تأثير المدرسة كبير أوى فى حياتنا

فى ابتدائى السنين مرت هادية جداً مافيهاش شئ يٌذكر غير أنى كنت متفوقة دراسياً.. درجات نهائية فى كل حاجة

ماكنش عندى أى إستعداد أسمح لحاجة او لحد يخطف منى التفوق ده لأن انا اللى تعبانة فيه.. وبالتالى ده حقى ! .. لكن كلمة " الحمد لله " ماكنتش تعرف طريقها على لسانى .. وكأنى كنت مبرمجة على الشكوى بس

انا فاكرة إن فى ابتدائى كان عندنا راهبة فرنساوية كانت كل يوم تقودنا فى الصلاة .. كل يوم نفس الصلوة : " يا إلهنا إحنا بنشكرك من أجل يوم جديد إنت بتديهولنا .. بنسلمك يومنا وحياتنا" وكلام كده

جملة ( بنسلمك يومنا وحياتنا ) ماكنتش فاهمة إن معناها : يارب أنا بسلمك عجلة القيادة فى حياتى إنت اللى هاتحدد أروح فين وأتكلم مع مين .. وأعمل ايه

جملة صغيرة وسهل إننا نقولها .. لكن عشان نعيشها بأمانة .. مش سهل أبد اً! .. مش سهل إنى أقرر أعيش على مزاج ربنا .. مش على مزاجى أنا

أتارى الموضوع فعلاً محتاج صلاة يومية وإستعداد حقيقى للتنفيذ

كان فى راهبة ماسكة إعدادى اسمها ( سير مندس ) لكن ماكنتش أى راهبة !.. كانت حكايتها حكاية

شابة أسبانية زى القمر ومخها ذرى بكل المقاييس ! .. يعنى دى لو كانت قعدت فى بلدها .. كانت بقت دكتورة نابغة أوكانت درست فى الجامعة !.. يا ترى ايه اللى خلاها تسيب حياة العالم وتيجى مصر عشان تدًرس علوم ورياضيات لشوية عيال ! .. ماكنش عندى إجابة

لكن كل اللى فات ده كوم .. واللى جاى كوم تانى

سير مندس كانت فى طريقها للصعيد هيه و 3 راهبات تانيين ... هى كانت سايقة العربية.. ربنا سمح انهم يعملوا حادثة كبيرة و النتيجة ان سير مندس قاعدة على كرسى متحرك... مشلولة ..!

وأمتى ؟!.. وهيه فى بداية التلاتينات من عمرها !.. يعنى فى عز شبابها ! .. طب ليه ؟!.. دى كانت رايحة الصعيد عشان تساعد المحتاجين ! .. برضه معنديش إجابة

مش كده وبس .. ( سير مندس ) كانت كمان بتدرس لنا دين ! .. وطبعاً كانت بتبتدى الحصة بإنها تقول : غمضوا عنيكم عشان نصلى

أنا فى أوقات كتير ماكنتش باغمض عينى عشان أتفرج عليها وهيه بتصلى !.. إيه ده ؟!.. إيه الخشوع ده ؟!.. هاموت وأفهم إنتى بتشكرى ربنا على ايه ؟

ع الكرسى المتحرك اللى إنتى قاعده عليه ؟!.. ولا ع العيشة اللى إنتى عايشاها بره بلدك وبعيد عن أهلك ؟!.. إنتى ازاى مش مخاصمة ربنا ؟!.. لا واللى يغيظ أكتر وأكتر .. انها بتكلمنا عن محبة ربنا كأنها شايفة منه دلع محدش شايفه !!!.. برضه معنديش تفسير

بمناسبة الكرسى المتحرك .. مره كانت بتكلمنا عن القناعة والشكر فى الظروف الصعبة .. وقالت : لو عندى عربية صغيرة .. بدل ما أقول ( ليه معنديش عربية كبيرة ؟ ) .. اقول : اشكرك يارب لانك إديتنى عربية صغيرة .. ولومعنديش عربية خالص .. بدل ما أقول : ليه ربنا مستخسر فىَّ عربية صغيرة ؟ .. اقول: أشكرك يارب لانك إديتنى قدمين أقدر أمشى بيهم

أنا وقتها كنت صغيرة وماعجبنيش الكلام طبعاً فضحكت بسخرية !.. شافتنى !.. سألتنى عن سبب ضحكى !.. قلت لها : أعفينى من الاجابة لانى مش عايزة أجرحك ! .. أصرت تعرف

فقلت لها : والشخص اللى ربنا سمح انه يتشل .. يبقى يشكر على إيه ؟

سؤالى أكيد كان جارح جداً !.. لكن هيه كانت أسد وماتهزتش !.. وكأن الكلام مش عليها أصلاً !.. ماكنش عندها أدنى إحساس بالنقص ! .. واحدة مالية إيديها من محبة ربنا ومستكفية بيها

قالت لى بيقين الواثق : عايزة تعرفى أنا بشكر ربنا على إيه ؟ .. أنا بشكره على الوقت اللى كنت ماشية فيه على رجلى !.. وبشكره على نوره اللى منور قلبى وحياتى وآخرتى !.. ماتقلقيش علىَّ !.. عندى كتير أشكر ربنا عليه !.. الأزمة عمرها ما كانت فى نقص دواعى الشكر .. المشكلة دايما فى العين اللى مش شايفة النعمة

أتناقش معاها ازاى وهيه بتقولى انها فاكرة تشكر ربنا ع النعمة اللى فى الماضى .. وقادرة تشكره ع الحاضر المؤلم .. ومقررة تشكره ع المستقبل ؟

وقالت لى : لما ربنا بيدى نعمة أو عطية لشخص .. بيقبلها بدون تفكير ويتمتع بيها .. لكن لو ربنا قرر يسحبها منه .. بيبقى إزاى ربنا يعمل كدا ؟!.. " تتكلمين كلاماً كإحدى الجاهلات ! أالخير نقبل من عند الله ، والشر لا نقبل ؟" أيوب 2: 10

حتى لوحيرتك زادات .. وقلبك كان بيبكى بدل الدموع دم .. إجرى على الرب و" اسكبى أمامه شكواكى " (مز142: 2).. إتكلمى معاه بدل ما تحتفظى بالمرارة فى قلبك من ناحيته !.. لعلمك .. هو شايف المرارة دى حتى لو إنتى مش بتستجرى تنقليها من قلبك للسانك !.. لكن تغضبى وتبعدى .. يبقى إنتى كده وصلتى إبليس لمراده !.. مراده يحول ربنا فى عنينا من أب مٌحب لجلاد قاسى

بقى أنا ماعرفش أشكر ربنا فى الوسع .. وهيه عايزة تقنعنى أشكره فى الضيق ؟!.. فقلت أزنقها فى الكلام ‍

قلت لها : تقدرى تقوليلى كانت فين محبة ربنا لما زميلتنا فلانة ماتت الشهر اللى فات ؟!.. بصراحة أمها معذورة لو مادخلتش كنايس بعد كدا

قالت لى بشفقة على شكّى الواضح فى محبة ربنا : مش كل حاجة بنقدر نفهمها " لأن كل أموره لا يجاوب عنها " ( ايوب 33: 13).. انا مش هاختلف معاكى فى إنه إذا كان بتر أعضاء الجسم قاسى وصعب قيراط .. فبتر أحباب القلب أقسى وأصعب 24 قيراط !.. لكن لو إحنا خاصمنا ربنا .. هانروح لمين ؟؟!!.. " أبر أنت يارب من أن أخاصمك " إرميا 12: 1

مهما حصل .. قولى لنفسك : ( ربنا صالح ) و ربنا أمين

صالح : أكيد له حكمة وقصد .. حتى لو أنا مش فاهماه

أمين وبيبعت الصبر والتعزية مع البلوى ..

الكلام دا سمعته منها من عشرين سنة .. لكن للأسف مافهمتوش إلا من فترة قريبة .. لأن فهم المواضيع الروحية مش بيتوقف على ذكاء العقل .. إنما بيتوقف على عمى القلب

وكمان قالت لى ( سير مندس ) : لازم تتعلمى ترتبى أولوياتك صح ! .. وإلا .. هاتبقى عاملة زى ( العروسة البلاستيك ) شكلها حلو ولبسها جميل .. وبتتكلم لغات .. لكنها فى الحقيقة ميتة ! .. مافيهاش حياة .. وده هايبقى حالك طول ماربنا مالوش مكان فى حياتك

وقالت لى : إن تعريف الغباوة هو البحث عن السعادة بعيداً عن الله لو حاولتى تدورى على السعادة فى أشياء او أشخاص غير الله .. مش هاتجنى غير كل تعاسة !.. أنا بصلى دايماً من أجلك ! .. إنتى فيكى حاجات حلوة كتير لكن خسارة تضيعى وقت فى الغباوة



مش ممكن أبداٌ تكون بتدور على ربنا بأمانة وهو يخفى نفسه عنك

وحتى لو إنت مش بتدور على ربنا خالص .. هوه برضه بيدور عليك ومشتاق لرجوعك لأنه بيحبك

دروس كتيرة فهمتها فى لمح البصر .. لكن أهم درس فيهم .. أخدت سنين طويلة عشان أفهمه ! .. مع انه درس بسيط !.. وهو تعريف الغباوة : البحث عن السعادة بعيداً عن الله

لو كنت فهمته من زمان .. كنت وفرت على نفسى وجع قلب كتير أوى !!.. " معرفة القدوس فهم " ( امثال 9: 10) " أما الأغبياء فيموتون من نقص الفهم " ( امثال 10: 21(

إوعى تكون لسه مش فاهم معنى الغباوة ؟!...

الرجوع الى أعلى الصفحة اذهب الى الأسفل
mena tito
مشرف


موهبتك : الكمبيوتر والموبيلات
شفيعك مين : مارمينا والبابا كيرلس والانبا كاراس
الأية الذهبية : كونوا بسطاء كالحمام وحكماء كالحيات
النوع : ذكر عدد المساهمات : 2238
تاريخ التسجيل : 27/03/2010
العمر : 23

مُساهمةموضوع: رد: اوعى تكون متعرفشتعريف الغباوه   الثلاثاء سبتمبر 28, 2010 10:02 am

هاااايل بجد قصة روعة جدا جدا ربنا يباركك
الرجوع الى أعلى الصفحة اذهب الى الأسفل
ابنه الملكه
+قبطى فعال+
+قبطى فعال+


موهبتك : الترانيم
شفيعك مين : العذراء مريم
الأية الذهبية : يا ابنى اعطنى قلبك ولتلاحظ عيناك طرقى
النوع : انثى عدد المساهمات : 279
تاريخ التسجيل : 22/09/2010
العمر : 26

مُساهمةموضوع: رد: اوعى تكون متعرفشتعريف الغباوه   السبت أكتوبر 02, 2010 6:29 am

ميرسى مينا ع مرورك
الرجوع الى أعلى الصفحة اذهب الى الأسفل
 
اوعى تكون متعرفشتعريف الغباوه
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
+††±منتديات وشـات افـــا كـاراس±††+ :: منتدى الروحى :: قصص روحية-
انتقل الى:  
الساعة الأن القاهرة (مصر)
جميع الحقوق محفوظة لـ+††±منتديات وشـات افـــا كـاراس±††+
 Powered by منتديات الأنبا كاراس ®ava-karas.yoo7.com
حقوق الطبع والنشر©2011 - 2010