جربت مرة الإحساس ده ؟

هل جربت مرة الإحساس ده ؟

انك حسيت ان ربنا بعيد قوي عنك .. و لقيت ان كل مشاعرك الروحية اختفت .. و حسيت ان كل كلمات فمك في الصلاة بقت مجرد كلمات خالية من أي روح
حاولت تقوم ببعض التمارين الروحية ..
خليت اصدقاءك يصلوا لأجلك ..
اعترفت بكل خطية يمكن تخيلها ..
لكن مفيش أي حاجة بتحصل .. !؟!
فتبدأ في النازل .. و تصرخ لامتي هتستمر الكآبة الروحية دي ؟ .. أيام ؟ .. أسابيع .. شهور؟ هل هيكون ليها نهاية فتصرخ في يأس .. هو ليه اللي بيحصللي ده كله ؟


لكن عندي ليك حاجة مهمة قوي لازم تعرفها ..


ان علشان صداقتك مع ربنا تنضج .. لازم تختبرها بفترات من الانفصال الظاهري .. أوقات تحس فيها ان ربنا نسيك و اتخلي عنك
اختبار مؤلم جدا .. لكن مهم جدا علشان نمو ايمانك .. و معرفة الأمر ده اعطت ايوب رجاء لما مقدرش انه يحس بوجود ربنا في حياته ( هأنذا أذهب شرقا فليس هو هناك .. و غربا فلا أشعر به .. شمالا حيث عمله فلا أنظره .. يتعطف الجنوب فلا أراه .. لأنه يعرف طريقي .. اذا جربني أخرج كالذهب .. بخطواته استمسكت رجلي .. حفظت طريقه و لم أحد )
( أي 23 : 8 – 10 )

و مثل ثاني .. ماكانش فيه أقرب من صداقة داود النبي لربنا لدرجة ان ربنا دعاه ( رجلا بحسب قلبي ) ..

و مع ذلك داود كتير اشتكي من غياب ربنا الظاهري

( يارب لماذا تقف بعيدا .. ؟ .. لماذا تختفي في أزمنة الضيق )


لكن عمر ربنا ما ترك داود .. و هو كمان عمره ما هيسيبك ..
ربنا كتير في وعوده قال ( لا أهملك و لا أتركك ) لكن ربنا ما وعدش ( انك دائما تحس بحضورة ) .. لكن ربنا بيعترف انه في بعض الأحيان بيستر وجهه عنا

لما ربنا يبان انه بعيد قوي عنك ..

ممكن تحس انه زعلان منك او انه بيأذيك بسبب خطية .. فالخطية فعلا بتفصلنا عن ربنا .. ( ( افسس 4 : 29 , 30 ) , ( 1تس 5 : 19 ) , ( أر 2 : 32 ) )
لكن أحيان كتيرة بيكون الاحساس بالهجر و البعد عن ربنا مالوش علاقة بالخطية .. لكن اختبار للايمان .. هل هاتستمر في محبته و الثقة بيه و عبادته و طاعته بالرغم من انك مش حاسس بحضوره ؟


عارفين ايه اكبر غلطة بنرتكبها .. ؟


اننا دايما بندور عن اختبار بدل ما بندور علي ربنا .. بنطلب احساس و لو ده حصل يبقي كده عبدنا او صلينا لربنا
لكن ده اكبر غلط .. لأن ربنا بيزيل مشاعرنا في احيان كتيرة قوي علشان مانفضلش معتمدين عليها ..
انك تدور علي شعور حتي لو كان شعور بالقرب من ربنا مش هو ده الصلاة


و علشان تفهم معني الكلام ده هاوضحه بقصة جميلة و معزية جدا لأحد القديسين


قيل عن أحد القديسين أنه مكث سنة كاملة يصلي و كأنه يتحدث الي حائط أصم ! فلا استجابات .. و لا تعزيات .. و لا تنسمات رضا ..

و لكنه وقف بايمان صلب و عزم علي الجهاد في وسط هذه الحالة المريرة
و قبلها علي انها صليب يحمله بل ينبغي ان يحمله
و يسير به خلف السيد المسيح ..
حمله بشكر .. حمله بحب .. حمله بمثابرة .. و صبر ..
صبر لأنه كان يعلم تماما ان .. الهدف من الصلاة ليس فقط الحصول علي التعزيات ..
انما الالتصاق بالحبيب و العشرة الدائمة معاه ..
عايزين تعرفوا مين الجبار ده ؟


ده القديس العظيم ( البابا كيرلس السادس )


رجل الصلاة


اللي كانت كل مشاكله بتتحل بالصلاة .. ماكانش رجل وعظات او كلمات لكن كل شئ كان بيطرحه قدام ربنا في الصلاة .. عرفتم ازاي وصل بقي للدرجة دي .. اذن انتظر الرب .. و اصبر له .. و كل ما يشوف ربنا جهادك .. هيعطيك كل اشتياقات قلبك

و كمان ساعات كتير لما بنكون اطفالا في الايمان

ربنا بيدينا كتير من المشاعر المؤكدة و كتير بيستجيب صلوات لينا مش ناضجة و اللي بتتمركز حوالين ذواتنا علشان نعرف انه موجود . .
لكن كل ما بننمو في الايمان ..
ربنا بيبدا يفطمك عن الأمور اللي بتعتمد عليها
علشان كده لازم نعرف الفرق بين حاجتين مهمين جدا
وجود ربنا و حضوره ..
فالأول هو حقيقة .. و
الثاني في الغالب احساس ..

فالله موجود حتي لو لم نشعر بوجوده

تعرف ايه اكتر موقف ممكن يوسع نطاق ايمانك ..

لما تحس ان الحياة انهارت قدامك .. لما ماتلاقيش ربنا في أي مكان .. تعرف ان كل ده حصل لأيوب .. فقد كل شئ في يوم واحد ..
و الأكثر احباطا انك لو قرات سفر ايوب هاتلاقي ان ربنا ماكلموش طوال 37 اصحاح .. ! !


طيب ازاي نسبح ربنا و نصليله لما نلاقيه صامت ؟ .
لما ماتكونش فاهم ايه اللي بيحصل في حياتك ؟



ازاي تبقي مرتبط بربنا وقت الأزمة و انت حاسس انك مش سامع صوته بوضوح؟



ازاي تثبت عينك علي الرب يسوع وقت ما عيونك تكون مليانه بالدموع ؟


و ماننساش و احنا بنصلي نرفع قلوبنا لاجل كل نفس متألمة .. مريضة .. حاسة بفشل أو احباط .. محتارة .. تايهة .. ياريت نرجع زي زمان ايام الكنيسة الأولي .. اننا نواظب علي الصلاة و نصلي لأجل كل محتاج .. لأن مفيش انسان دلوقتي صدقوني مش محتاج صلاة . يللا كلنا نصلي لأجل بعض .. لأن المسيح امين في وعدة لما قال ..


( و أقول لكم أيضا ان اتفق اثنان منكم علي الارض في أي شئ يطلبانه فانه يكون لهما من قبل أبي الذي في السماوات )
( مت 18 : 19 )


و هو قادر يحقق لنا كل طلباتنا ان كانت حسب ارادته

ياريت تجيب ورقة صغيرة و تكتب فيها اسماء كل اللي طالبين صلاتك .. و تذكرهم في صلاتك .. أو تقول


( يارب أولادك في المنتدى اللي طالبين صلاة .. ان كانوا طالبين شفاء أو تعزية أو معونة أو نجاح أو صبر في الشدة أو أطفال .. حقق لهم طلباتهم ان كانت حسب ارادتك .. ,,و ان كانت بغير ارادتك .. أعطيهم الصبر و ارشدهم لطريق ارادتك .. و اكشف ليهم عن تدبيرك لخطة حياتهم )


و لا تنسوا الصلاة لأجل نجاح و استمرارية الخدمة


صلو من اجلي ..

انا فعلا جربت الاحساس دة وهو فعلا احساس صعب اوى
ميرسى كتيررررر لموضوعك الجميل يامينا

و ماننساش و احنا بنصلي نرفع قلوبنا لاجل كل نفس متألمة .. مريضة .. حاسة بفشل أو احباط .. محتارة .. تايهة .. ياريت نرجع زي زمان ايام الكنيسة الأولي .. اننا نواظب علي الصلاة و نصلي لأجل كل محتاج .. لأن مفيش انسان دلوقتي صدقوني مش محتاج صلاة . يللا كلنا نصلي لأجل بعض .. لأن المسيح امين في وعدة لما قال ..


( و أقول لكم أيضا ان اتفق اثنان منكم علي الارض في أي شئ يطلبانه فانه يكون لهما من قبل أبي الذي في السماوات )
( مت 18 : 19 )


و هو قادر يحقق لنا كل طلباتنا ان كانت حسب ارادته



موضوع بجد رااائع يامينا تسلم ايدك بجد ربنا يباركك

ميرسى بجد ياجماعة لمروركم المميز وميرسى كاتى الامورة ومارى ربنا يباركك